آغلاما ای منیم بیر دسته گولوم
آغلاما ای منیم بیر دسته گولوم
ائلیمده نیسگیللی، سوزلو بولبولوم
آغلاسان آغلارام یاغیشلار کیمین
یاندیرار آغلارین ایمانین دینین
باجون هاردا قالیب آنان هاردادیر
سئوگولو قارداشون آتان هاردادیر
ندن تک ایلشیب آغلورسن بئله
بو یاسی شیونی کیم سالیب ائله
آغلاما ای منیم آرزوم دیله گیم
آغلاما ای منیم کونلوم اوره گیم
گل باسیم باغروما سیلیم اوزو وو
گل مهربان بالا اوپوم گوزو وو
سن بو ائلین نازلی دوزلی قیزی سن
سن گله جکلرین یولو ایزی سن
قووزا باشین قویما یانسین اوره گیم
سن اوره ک وئر قوی پرله سین دیله گیم
ای ائلیمین نازلی قیزی داروخما
گون آچولار بیر آز دایان قاروخما
فلک سالیب اوره گیوه کدرلر
قویما ایسین الیف قددین بو غملر
قارا داغدا سن یادیگار بالاسن
آرزوم بودور ساغ سالامات قالاسن
آنان یوخسا سن آناسان بو یورده
دوزمه لییق بو هیجرانه بو درده
منیم قیزیم سنین باشین ساغ اولسون
هیمه تین داش ایراده نده داغ اولسون